Кино блог

IMDB шилдэг 250-н тухай

IMDB шилдэг 250 киноны жагсаалтыг кино сонирхогчид тухайн кинонд өгсөн үнэлгээнд үндэслэн гаргадаг. IMDB-д кино бүр өөрийн хуудастай байх бөгөөд бүртгүүлсэн хэрэглэгчид уг киноны хуудсанд орж, 1-10 хүртэлх хэмжээсээр оноо өгдөг (1- муу, 10-сайн). Шилдэг 250-н жагсаалтад орсон киноны үнэлгээг Байесын гажуудалгүй үнэлгээгээр гаргадаг. Үүнд:

Жигнэсэн үнэлгээ (ЖҮ) = (v ÷ (v+m)) × R + (m ÷ (v+m)) × C

 энд:
  R = тухайн киноны дундаж үнэлгээ
  v = тухайн кинонд санал өгсөн тоо
  m = Шилдэг 250-н жагсаалтад орох доод саналын тоо (одоогоор 1300)
  C = нийт киноны дундаж үнэлгээ (одоогоор 6.7)

Мөн Шилдэг 250-д зөвхөн идэвхитэй санал өгөгчдийн саналыг тооцдог.

Энэхүү арга нь үнэлгээний гажуудлыг багасгадаг. Жишээ нь нэг киног 2000 хүн сайн гэж үзэж байхад түүнтэй адил үнэлгээтэй өөр нэг киног 200,000 хүн сайн гэж бодож байвал илүү олон саналтай кино нь дээгүүр жагсана. Мөн зарим хүн өөрийн дургүй кинонд үнэн үнэлгээнээсээ доогуур санал өгөх хандлага гаргадаг. Жишээ нь Бөгжний эзэн киноны 3-р анги анх гарч эхлэхэд Оддын дайн киноны үнэнч фэнүүд олноороо ярилцаж тохиролцон Бөгжний эзэн 3-т 1 оноо өгсөн тохиолдол гарч байсан. IMDB мөн энэ төрлийн гажуудлыг арилгах статистикийн арга үнэлгээндээ ашигладаг.

Эдгээрийн дүнд IMDB Шилдэг 250 киноны жагсаалт бусад жагсаалтаас илүү сайн болж чаддаг. Гэтэл олон хүмүүсийн шимтэн хүлээдэг Оскарын шагналд 5830 гишүүний саналаар ялагчийг тодруулдаг бөгөөд сонголт нь заримдаа оновчтой болж чаддаггүй хэмээн шүүмжлэлд их өртдөг. Үүний тод жишээ нь 14 шагналд нэр дэвшиж, 11 Оскар хүртсэн Титаник юм. Энэ киног одоо үзээд ямар ч гоц гойд зүйл байхгүйг та ажиглах байх.

За тэгээд та үзсэн киноныхоо талаар ойлгоогүй зүйл байвал IMDB-н форумд ороод тодруулж болно.

Бичсэн Тулгаа, 2 сарын 11, 2007 он бүлэг IMDB Шилдэг 250 кино, Мэдээ